“મને હતું જ કે તારો ફોન આવવો જોઈએ––
હમણાં. અબી જ.
આજે તારે ત્યાં તો ફાધર્સ ડે, ખરુંને?
ગઈ કાલ રાતથી તારી રાહ જોતો હતો.”
પપ્પાનો આ વર્ષો જૂનો સંવાદ.
એ અવાજના ભણકારા કાનમાંથી નથી જતા.
આજે તમારો દિવસ છે–– પપ્પા, ફોન ઉપાડો!
“બેટા, જોને પેલો ઉપરવાળો લઇ નથી જતો, થાક્યો છું હવે”
બે દસકાની એમની એક જ ફરિયાદ.
એ સાદ તો જો કે ઉપરવાળાએ સાંભળ્યો, પણ
એ અવાજના ભણકારા કાનમાંથી નથી જતા.
પેલે છેડે વરંડામાં ઉભા છે
મારા ફોનની રાહ જોતા––
પપ્પા, સાંભળો છો કે?
